Ulme javlli: ”Kultuvrra galggá årrot fábmogis ja hásstaliddje ja tjadnusij dagi moalgedimfriddjavuodajn vuodon. Gájkajn galggá máhttelisvuohta oassálasstet kultuvrraj. Barggammiella, moattevuohta ja dájdalasj kvalitäjtta galggá bájnnet sebrudagá åvddånimev”.
Doarjjagij baktu doarjjot ja diedojt hádjet
Akta mijá ájnnasamos bargojs la doarjjagijt juohket friddja kultuvrraj ja girjálasjvuohtaj, kultuvrrainstitusjåvnåjda, dajvajda ja kommuvnajda. Gå doarjjagijt juohkep de biedniga manni degu dal:
- Girjálasjvuohtaj, kultuvrratjállusijda, låhkåmåvddånahttemij ja girjjevuorkájda
- Gåvvå- ja hábbmimdájddagijda ja vuosádisájda
- Musijkkaj, teáhterij, dánssaj ja ietjá senadájddagijda
- Doajmme skåvllåj ja kultuvrraskåvlåjda
- Rijkasasj unneplågoj kultuvrraj
Ienep gå lahkke mijá juohkem biednigijs manni rijka dajvajda kultuvrraaktisasjbargo háme baktu, gånnå dajvva ja stáhta aktan barggaba. Dat hábme galggá dajvajda vaddet máhttelisvuodav stivrrit ietjasa kultuvrrapolitijkalasj vuorodimij åvdås, ja vil biednigij juohkema åvdås kultuvrraj. Ájggomus la kultuvrra boahtá viesajdiddjij lagábuj ja gájkajda sjaddá máhttelisvuohta kutuvrraj säbrrat.
Oasse mijá bargos la aj diedojt hádjet ja åvddånimev jådedit. Diedojt tjoahkkip ja hádjep guoradallamij ja gåtjedimij baktu ja gå tjuovvop värálda åvddånimev. Mij hásadip konferánsajt ja seminárajt gånnå máhttá vuojnoj birra ságastallat.
Rievtesvuohtavuojnno
Dájda- ja kultuvrrabirrasin la raddidusás gåhttjom åvddånahttet sämmi riektájt ja máhttelisvuodajt gájkajda juogu de seksuálalasj hámes, sjiervveidentitejtas jali sjiervvegullumis. Miján la vásstádus doajmmamfámodisvuohtaássjij åvdås, ja gåhttjom nannit rijkasasj unneplågoj kultuvrav ja álggoálmmuga sámij kultuvrav. Mij aj galggap avtastahttet mánájriektá- ja nuoraj-, moattevuohta- ja buohtaárvvusasjvuojnov bargguj.
Mánáj ja nuoraj riektá kultuvrraj
Mij barggap vaj máná ja nuora ielvvi smidás dájddagav ja kultuvrav, oassálassti dájda- ja kultuvrrasajijn ja ietja oadtju ietjasa milta barggat. Dahkap dav degu dal gå juohkep doarjjagijt sidjij gudi barggi kultuvrajn mánájda ja nuorajda jali vaj ietja máhtti barggat.
Kultuvrraráden gávnnu Kulturskolecentrum [Kultuvrraskåvllåguovdásj], rijkasasj diehtoguovdásj rijka kultuvrraskåvlåjda mij hádjá diedojt ja juohká doarjjagijt ma viehkedi åvddånahttet vijdep oassálasstemav kultuvrraskåvlåjn.
Kultuvrraráden la vijdes barggo låhkåmav åvddånahttet. Mijá jahkásasj mánáj- ja nuorajgirjjekatalåvggå vuoset tjiehpes ja vijdes válljimav dán jagásj girjijs. Bokstart [Girjjeálggo] ájggu árrat åvdedit mánáj gielav ja låhkåmmielav.
Kultuvrraráden gávnnu låhkåmráde tjiehpij, biejadum ráddidusás. Låhkåmráde l viehkken barggij gaskan kultuvrraoasen, skåvlåjn, sebrudagán, álmmukåhpadimen, girjjeboargálijn, almmudagájn ja ietjá äládusåsijn. Mijá låhkåmåvdåstiddje barggá dan åvdås vaj gájka, duogátja berustahtek, galggi sämmilágásj máhttelisvuodajt oadtjot girjijt gávnatjit.
Rijkajgasskasasj barggo
Rijkajgasskasasj barggo nanni dájdalasj åvddånimev ja duoddi moattevuodav ja kvalitejtav kulturuvrravaljen – goappátjagá Svierigin ja ålggorijkajn. Dat la álggo mijá rijkajgasskasasj bargguj.
Swedish Literature Exchange [Svieriga Girjálasjvuoda Lånudibme] åvddånahttá svieriga girjálasjvuodav ålggorijkajn. Ålggorijkak almmudagá, jårggåliddje, festivála ja iehtjáda máhtti doarjjagijt åhtsåt jårggålittjat ja hájátjit svieriga girjálasjvuodav ja dramatijkav ålggorijkajn.
Astrid Lindgren Memorial Award [Astrid Lindgrena mujttobálkká] la värálda stuorámus prijssa mánáj- ja nuorajgirjálasjvuohtaj. Juohkka jage ulmusj jali organisasjåvnnå bálkáv oadtju mij duoddi girjálasjvuoda árvov mánájda ja nuorajda ålles väráldin.
Kultuvrraráden gávnnu Kreativa Europa Desk [Kreatijva Eurohpa Aktavuohtakåntåvrra] gånnå máhtá doarjjagav oadtjot gå åtså kultuvrradoarjjagav EU:as. Kreativa Europa la EU:a prográmma kultuvralasj ja kreatijvalasj sajijn.
Kultuvrraráde l rijkasasj aktavuohtasadje UNESCO konvensjåvnnåj suoddjitjit ja åvddånahtátjit kultuvra moattevuodav. Ájggomus konvensjåvnåjn la vaj dájddára, kultuvrrabargge ja viesajdiddje ålles väráldin oadtju máhttelisvuodav bargojt dahkat, hádjet ja ietja vijdes oasev kultuvras niektit, degu rijkajgasskasasj aktisasjbargo baktu.
Kultuvrraráde jådet rijkajgasskasasj prográmmav värálda birra nannitjit ja suoddjitjit dájdalasj friddjavuodav. Prográmma biednigahteduvvá doarjjomfábmudagás Sida, ja ulmme l vidjurijt buoredit dájddárijda vaj bukti nåvtik barggat, vuosedit ja bargojt rájadit ja e galga dárbahit ballat nihtojs jalik haddudallamijs.
Mijá webbasajen gávna gájkka mijá doarjjagijt ja diedojt gudi máhtti doarjjagijt åhtsåt. Dån gávna diedojt gåk mij åvddånahttep dájddaga ja kultuvra åvddånimev ietjá vuogijn gå doarjjagij baktu, gej mij barggap ja mijá barggamvuogijt.
Buorisboahtem åtsådit ienebuv mijá birra ja aj dav valjes dájddagav ja kultuvrav Svierigav birra majt mij iehtjádij siegen doarjjop!