Päämääritten mukhaan ”Kulttuuri pittää olla tynaminen, haastava ja sitomaton voima jonka perusta oon sanavaphaus. Kaikila pittää olla maholisuus osalistua kultuurielähmään. Kreativiteetti, moninaisuus ja taitheelinen laatu pitävät leimata yhtheiskunnan kehitystä”.
Antaa tukea avustuksen kautta ja levittää tietoa
Yks meän tärkeimistä tehtävistä oon ette jakkaa avustusta vaphaale kulttuurille ja kirjalisuuele, kulttuuri-institysuunile, rekiuunile ja kunnile. Ko met jaama avustusta niin rahat menevät muun muassa seuraaville:
- Kirjalisuuele, kulttuuriavisille, lukemisetistämiselle ja kirjastoile
- Kuva- ja muototaitheele ja näyttelyile
- Musikille, teatterille, tansile ja muule seenitaitheele
- Luovale koulule ja kulttuurikouluile
- Kansalisitten minuriteetitten kulttuurille
Enämpi ko puolet rahoista joitako met jaama menevät maan rekiuunille kulttuuriyhtheistyömallin kautta, jossako rekiuuni ja valtio toimivat yhtheistyössä. Malli pittää antaa rekiuunile maholisuuen päättää omitten kulttuuripolittisitten priuriteerinkitten yli ja kunka rahat kulttuuhriin jaethaan. Tarkotus oon ette kulttuuri tullee likemäksi kansalaisia ja ette kaikin saavat maholisuuen olla matkassa kulttuurielämässä.
Ette levittää tietoa ja vaikuttaa kehityksheen oon kansa osa meän työstä. Met kokoaama ja levitämmä tietoa tutkimuksitten ja ylösseurauksitten kautta ja seuraamalla kehitystä muuala mailmassa. Met järjestämmä konferensiä ja seminaarieita johonka met kuttuma tepathiin ja keskustelhuin.
Oikeusperspektiivi
Met olema hallitukselta saahneet tehtäväksi taite- ja kulttuurialuheela ette etistää tasa-arvosia oikeuksia ja maholisuuksia kaikile riippumatta seksyelliä suuntautumista, sukupuoli-itenttiteettiä elikkä sukupuolen itenttifieerinkiä. Meilä oon sektorivastuu toimintarajotuskysymyksissä ja tehtävännä ette vahvistaa kansalisitten minuriteetitten ja saamelaisen peruskansan kultuuria. Met piämä kansa intekreerata lapsioikeus- ja nuoriso-, moninaisuus- ja tasavertasuusperspektiiviä meän työssä.
Lapsitten ja nuoritten oikeus kulttuuhriin
Met tehemä töitä ette lapset ja nuoret saavat kokea professunelliä taitetta ja kulttuuria, olla matkassa taite- ja kulttuurielämässä ja ette net itte saavat lua. Sitä met tehemä muun muassa jakamalla avustusta aktöörille jokka tuottavat kulttuuria lapsile ja nuorile elikkä maholistavat ommaa luomista.
Kulttuuriraatissa oon Kulttuurikoulukeskus, kansalinen tietokeskus maan kulttuurikouluile. Kulttuurikoulukeskus levittää tietoa ja jakkaa avustusta jokka eesauttavat laajeman osalistumisen etistämisheen kulttuurikoulussa.
Kulttuuriraatila oon laaja toiminta ette etistää lukemista. Meän jokavuotiset lapsi- ja nuorisokirjakatalooki esittää hyvälaatusen ja laajan valikoiman vuen kirjatittelistä. Kirja-alku oon satsaus ette varhain kehittää lapsitten kieltä ja lukemislystiä.
Kulttuuriraatila oon lukemisraati jossako oon eksperttiä jokka hallitus oon valikoinu. Lukemisraati eesauttaa kulttuurin, koulun, siviliyhtheiskunnan, kansankoulutuksen, kirjakaupan, förlaakitten ja muitten elinkeino-ositten aktööritten välisheen yhtheistyöhöön. Meän lukemisampasatööri toimii ette kaikin riippumatta taustaa, pitävät saaja samat maholisuuet päästä kirjalisuutheen ja tulla lukijoiksi.
Kansanvälinen työ
Kansanvälinen vaihto vahvistaa taitheelista kehitystä ja luopii kulttuuritarjonan moninaisuutta ja laatua – niin Ruottissa ko ulkomaila. Se oon meän kansanvälisen työn lähtökohta.
Swedish Literature Exchange etistää ruottalaista kirjalisuutta ulkomaila. Ulkomaanlaiset förlaakit, kääntäjät, festivaalit ja muut aktöörit saattavat hakea avustusta ette kääntää ja levittää ruottalaista kirjalisuutta ja tramatiikkiä ulkomaila.
Astrid Lindgren Memorial Award oon mailman suuriin palkinto lapsi- ja nuorisokirjalisuuele. Joka vuosi palkithaan yhtä henkilöä elikkä organisasuunia joka eesauttaa kirjalisuuen merkityksheen lapsile ja nuorile koko mailmassa.
Kulttuuriraatissa oon Kreativa Europa Desk jostako sie saatat saaja tukea ko sie meinaat hakea kulttuuriavustusta EU:stä. Kreativa Europa oon EU:n ohjelma kultturellile ja kreatiivile aluheile.
Kulttuuriraati oon kansalinen kontaktipiste UNESCO:n konvensuunile ette suojata ja etistää kultturelliä moninaisuutta. Konvensuunin tarkotus oon ette taiteelioila, kulttuurityöläisilä ja kansalaisila koko mailmassa oon samat maholisuuet ette lua, tuottaa, levittää ja ottaa ossaa laajasta kulttuuritarjonasta, muun muassa kansanvälisen yhtheistyön kautta.
Kulttuuriraati vettää kansanvälistä ohjelmaa ette klupalisti vahvistaa ja suojata taitheelista vaphautta. Avustusvirasto Sida rahottaa ohjelmaa ja päämäärä oon ette parantaa ehtoja taiteelioile ette vaphaasti lua, näyttää ja jakkaa taitetta ilman ette tarttea joutua uhan elikkä kostoitten kohtheiksi.
Meän webbipaikala sie löyät meän avustukset ja informasuunia kukka saattavat hakea avustuksia. Sie löyät informasuunia kunka met etistämmä taitheen ja kulttuurin kehitystä muila laila ko avustuksilla, kenenkä kansa met tehemä yhtheistyötä ja stratekiitä kunka met tehemä töitä.
Tervetuloa ottamhaan selvää enämpi meistä ja Ruottin rikhaasta taite- ja kulttuurielämästä jotako met olema matkassa tukemassa!