Sillona pennar att: ”Kultur ska ascha je dynamisk, utmanande ta tchi panndlo sorralopa kai keras vri fonn ytrandefrihet. Sassaren ska kamma möjlighet te hunka ninna dre kulturen. Kreativitet, mångfald ta konstnärlig kvalitet aschar dova kai ska prägla marro temmengro utveckling”.
Hasstra ninna lovengro hasstrepa ta janepa
Jekk fonn marre baredera buttepan aschar te dela vri lovengro hasstrepa to dova fria kultur ta litteratur, kulturinstitutioner, regioner ta kommuner. Kanna menn delar vri lovengro hasstrepa jar lovijarna masskar sass to:
- Litteratur, kulturtidskrifter, hasstrepa te drabbra ta bibliotek
- Bild- ta formkonst ta ninna utställningar
- Basschrepa, teater, kellepa ta vaver scenkonst
- Kultur-kerepa, sikkrepa ta kulturskolor
- Dolla temmengre minoriteters kultur
Butter fonn pasch fonn sass lovijar kai delas vri jar to marre temmengre regioner, tella kultursamverkansmodellen, kai region ta temm buttar kettanes. Dova aschar forr regioner ska kamma möjlighet te soles penna så lovijana ska brukas to. Dennkrepan aschar forr kultur te ava passer to-an manusch dre temmen ta forr sassaren te naschta te hunka ninna dre kultur- kerepan.
Te buchla vri janepa ta te butta forr utveckling aschar ninna je kotta fonn marro buttepa. Menn kenndar ta buchlar vri janepa masskar te kera utredningar ta uppföljningar, ta te pallan-ja kovvar kai sker dre vaver pu’ar.
Buttepa fonn vri’ann horrtepan
Dre marro buttepa palla konst- ta kultur buttar menn fonn vri’ann dennkrepan att sass manusch ska kamma emlege horrtepan ta möjligheter, oavsett harr jekk manusch hejjar se soles.Menn kammar ninna ansvar preall puttchepan kai fokuserar pre lanngale-manusch ta kultur fonn temmengre minoriteter ta pajjko- manusch. Buttepan ska ninna keras vri fonn je dennkrepa palla terne, mångfald ta jämställdhet.
Dolla ternengre horrtepa forr kultur
Menn buttar forr terne ska le te dikka ta schunna professionell konst ta kultur, ta te hunka ninna dre konst- ta kultur- kerepa ta soles le te kera savot. Dova keras masskar sass te dela vri lovengro hasstrepa to dollen kai kerar kultur forr terne eller möjliggör kulturakko buttepa forr terne.
Pre Kulturrådet aschar Kulturskolecentrum, je temmengro janepasko center forr marre temmengre kulturskolor. Kulturskolecentrum buchlar vri janepa ta delar vri lovengro hasstrepa kai aschar forr te hillpra butter manusch te hunka ninna dre kulturskolan.
Kulturrådet kerar je buchlo buttepa forr te le butter manusch te drabbra. Marro berscheskro barn- ta ungdomsbokskatalog kammar je buchlo vällkrepa fonn drabbeliner. Bokstart aschar je buttepa forr te utveckla rakkrepa forr nykkosa ta te jangna je volltrepa te drabbra.
Pre Kulturrådet aschar ninna je läsråd, kai aschar experter vällkrade vri fonn regeringen. Läsrådet aschar forr te hasstra buttepa masskar kultur, skola, civilsamhälle, folkbildning, bokhandel, förlag ta vavera parter fonn näringslivet.
Masskar-temmengro buttepa
Masskar-temmengro parrepa kerar dova konstnärliga utveckling sorraleder ta kerar pre je mångfald ta kvalitet dre kulturen — dre Svedikko-temmen ta vavera temmar.
Swedish Literature Exchange hasstrar Svedikke drabbeliner te ava buchlade vri dre vavera temmar. Vri-temmengre förlag, tchibbakke rissrepangre, festivaler ta vavera aktörer motte le lovengro hasstrepa forr te rissra Svedikke drabbeliner ta dramatik to vavera rakkrepan dre vavera temmar.
Astrid Lindgren Memorial Award aschar dova pu’engro baredera pris forr drabbeliner forr terrne. Svakko berscht delas je pattipaskro pris to je manusch eller organisation kai buttar mé drabbeliner forr terne preall saro pu’n.
Pre Kulturrådet aschar ninna Kreativa Europa Desk, kaj du motte le hasstrepa kanna du ska roddra ta manga lovengro hasstrepa fonn EU. Kreativa Europa aschar je EU:skro program palla kulturakke ta kreativa kerepan.
Kulturrådet aschar Svedikko temmengro kontaktpunkt forr dova UNESCO:skro konvention forr te rakka ta hasstra kulturakko mångfald. Dova konvention aschar forr konstnärer, kultur-buttepangre ta temmengre manuscha dre saro pu’n ska kamma möjlighet te kera, buchla ta dikka ta schunna je buchlott utbud fonn kultur, delvis fonn vri’ann masskar-temmengro buttepa.
Kulturrådet kammar ninna je masskar-temmengro program forr te hasstra dova konstnärliga frihet te ava sorraledder. Programmet prejjstras fonn biståndsmyndigheten Sida. Sillot fonn buttepat aschar forr te le fedder villkor forr konstnärer kai kerar, sikkrar ta buchlar vri konst te tchi ava prettane, le dabb eller pagging.
Pre marro internet-rigg latchar du information palla marre lovengre hasstrepan ta konn motte manga ta le dollen. Du latchar ninna info palla vavertchanne hasstrepan forr konstakko ta kultrakko utveckling fonn vriann lovengro hasstrepa. Ninna drabbrar du dojj mé konn menn buttar kettanes ta save dennkrepan menn kammar dre marro buttepa.
Ava så latcho te jana butter palla mennde ta palla dova kuschno konstakko ta kulturakko buttepa kai menn hasstrar dre Svedikko-temmen!